తెలుగునాట పొడుపుకథలు చాలా ఉన్నై, రకరకాల రూపాల్లో. వీటిలో చదువుకునేవాటికంటే, పాటలుగా వినవచ్చినవి ఎక్కువకాలం నిలిచాయి కూడా. ఇక్కడ వినవస్తున్న పొడుపుకథ పాట ఒకటి, మీకోసం.
గానం: చంద్ర, రెడ్డి, సయ్యద్ ప్రకృతిబడి, చెన్నేకొత్తపల్లి.
కనుక్కో కనుక్కో ఓ బాలా
పొడుపుకథా చెబుతాను
కథ విప్పండీ-
కథ చెప్పండీ-
చూడచక్కని చిన్నది, గోడమీద ఉన్నది
నువ్వుచూస్తే నీలాగ, నేనుచూస్తే నాలాగ
ఏమిటది ? ఏమిటది ? ఏమిటది-
అద్దం!!
ఆవును గుంజకు కట్టేసి దూడ మేతకు వెళ్ళింది.
సాయంకాలం తిరిగొచ్చి ఆవుకు బంధం విప్పింది.
ఏమిటది ? ఏమిటది ? ఏమిటది-
తాళంచెవి!.
అమ్మకడుపులో నిద్రిస్తారు అరభైమంది పిల్లలు
మేలుకున్న పిల్లవాడు కాలిపోతాడు
ఏమిటది ? ఏమిటది ? ఏమిటది-
అగ్గిపుల్ల!
పొద్దున్నే జననం, రాత్రంతా శయనం
సాయంకాలం పయనం
ఏమిటది ? ఏమిటది ? ఏమిటది-
సూర్యుడు!
నల్లని ముఖమూ, నలచదరం
పిల్లలు పెట్టే తెల్లని వాతలు
ఏమిటది ? ఏమిటది ? ఏమిటది-
పలక!
ఒంటి చేతి పిల్లా, వడ్డించు మల్లా
ఏమిటది ? ఏమిటది ? ఏమిటది-
గరిటె!
కవలపిల్లలిద్దరు, కాళ్ళకింద ఉందురు
ఒకరిని విడచి ఉండరు, ఒంటరిగా నడవరు.
ఏమిటది ? ఏమిటది ? ఏమిటది-
చెప్పులు!
