తేనెల తేటల మాటలతో
మన దేశ మాతనే కొలిచెదమా
భావం భాగ్యం కూర్చుకొని - ఇక
జీవనయానం చేయుదమా
సాగర మేఖల చుట్టుకొని - సుర
గంగ చీరగా మలచుకొని
గీతాగానం పాడుకునీ - మన
దేవికి ఇవ్వాలి హారతులు... "తేనెల"
గాంగ జటాధర భావనతో - హిమ
శైల రూపమే నిలబడగా
గలగల పారే నదులన్నీ - ఒక
బృంద గానమే చేస్తుంటే..... "తేనెల"
ఎందరో వీరుల త్యాగఫలం - మన
నేటి స్వేచ్ఛకే మూలబలం
వారందరినీ తలచుకొని - మన
మానస వీధిని నిలుపుకొని..... "తేనెల"