స్వాగతం

కొత్తపల్లి ఆగస్టు సంచికకు స్వాగతం. మీకందరికీ స్వాతంత్ర్య దినోత్సవ శుభాకాంక్షలు.

స్వాతంత్ర్యం అనగానే, ఎవరో చెప్పిన కథ గుర్తుకు వస్తున్నది ఒకటి:

ఒక ముసలి రాజుగారి దగ్గర ఒక పిట్ట ఉండేదట. అది మనిషిలాగా మాట్లాడేదట. రాజుగారు దానికి ఓ బంగారు పంజరం చేయించి శ్రద్ధగా సాకేవాడు. అది కోరిన కోరికల్లా తీర్చేవాడు. అరవయ్యేళ్ళు అలా కలిసి బతికారు వాళ్లు.

ఓసారి రాజుగారు దూరదేశం వెళ్లాల్సి వచ్చింది. మధ్యదారిలో ఈ పిట్ట పుట్టినిల్లు ఉంది. రాజుగారు వెళ్తూ వెళ్తూ అడిగారు: " పిట్టా, మీ పుట్టినింటి మీదుగా వస్తాను, మీ వాళ్లకు నీ గురించి ఏమైనా చెప్పాలా? " అని. " మీ చెల్లి మీగురించే రోజూ ఆలోచిస్తోంది, రావాలంటే వీలు చిక్కటం లేదు " అని చెప్పమంది పిట్ట.

’సరే’నని రాజుగారు ప్రయాణమయ్యారు. వెనక్కి వస్తూ పిట్ట పుట్టినిల్లు ఉండే చెట్టు దగ్గర ఆగి బిగ్గరగా అరిచారు: " మీ చెల్లి మీగురించే రోజూ ఆలోచిస్తోంది, రావాలంటే వీలు చిక్కటం లేదు " అని. ఆ మాట వినగానే అక్కడి పక్షులన్నీ నిశ్శబ్దం అయిపోయాయి. ఒక పిట్ట టప్పున క్రిందపడి గిలగిలా తన్నుకొని నిశ్చేష్టం అయిపోయింది.

రాజుగారు నొచ్చుకున్నారు. వెనక్కి వచ్చి తన పిట్టకు ఈ సంగతి చెప్పారు బాధగా. వినగానే ఆ పిట్టకూడా నిశ్శబ్దం అయిపోయింది. టప్పున క్రిందపడింది. ఇక కదలలేదు. రాజుగారికి దు:ఖం వేసింది. పంజరంలోంచి దాన్ని బయటికి తీసి బాధగా కిటికీ దగ్గర పడుకోబెట్టారు.

మరుక్షణంలో అది ఎగిరింది. దూరంగా చెట్టుకొమ్మన వాలింది. బిగ్గరగా ఇలా అన్నది: " రాజా, నేను ఇప్పుడు ఏం చేయాలో మా అక్క నాకు నీ ద్వారానే కబురంపింది. " అని.

రాజుగారు ఇంకా నొచ్చుకున్నారు. " నేను నిన్ను అరవయ్యేళ్ళుగా సాకాను. ఇంకా నువ్వు అసంతృప్తిగానే ఎందుకున్నావు? నువ్వడిగింది నేను ఏది ఇవ్వలేదు? ఇంకా నువ్వు నానుండి దూరంగా పోవాలనే ఎందుకనుకుంటున్నావు? "

" అరవయ్యేళ్ళుగా కోల్పోయిన స్వాతంత్రంలోని ఆనందాన్ని సొంతగా చెట్టుమీద వాలిన ఈ ఒక్క క్షణంలో అనుభవిస్తున్నాను. రాజా, స్వతంత్రప్రేమికి స్వాతంత్ర్యాన్ని మించిన అవసరం వేరే ఏమీ లేదు. ఎన్నేళ్ళైనా సరే, ఆ జీవి స్వాతంత్ర్యంకోసం ఎదురుచూస్తూనే ఉంటుంది." అని.

నిజమైన స్వాతంత్ర్యంకోసం మనం అందరం ఎదురుచూద్దాం, ఇంకా, ఇంకా.. ఆ పక్షిమాదిరి. మనందరి కలలూ నిజం కాకపోవు, ఏదో ఒకనాటికి.

ఈ ఆగస్టు నెల కొత్తపల్లి పత్రిక మనలో స్వాతంత్ర్యపుటాలోచనల్ని రేకెత్తించాలని ఆశిస్తూ-

మీ-

కొత్తపల్లి బృందం.

3 వ్యాఖ్యలు

  1. THIS STORY GIVES ALL CREATURES NEEDS FREEDOM. HAPPY INDEPENDENCE DAY.

    వ్రాసిన వారు: G.SADHANA — August 18, 2008

  2. This is simply awesome! Hope to write for you in future :-)

    వ్రాసిన వారు: Aparna Kalley — August 6, 2008

  3. Simple story to tell about current Indian scenario. How many Augusts have passed in our lives and how many more Augusts do we need to become free of corruption, poverty, illiteracy, hunger and filthy conditions of our poor neighbours.

    Parrot falling down is a key to get out in this story. But Rising above current anti-social blocks and WORKING FOR A BETTER INDIA is the only key to feel the spirit of NEW INDIA.

    Thank you Kothapalli Brundam for doing a good work. Came to know about you from a friend Ajanta Attaluri (U.S.A)

    A NavTarangite (www.navtarang.com)

    Wish you all a very happy Independence day.

    వ్రాసిన వారు: Jagadish — August 5, 2008


వ్యాఖ్య రాయండి